АКАФИСТ СВЯТОМУ ПРАВЕДНОМУ ИОАННУ КРОНШТАДТСКОМУ

 КОНДАК 1

Избранному чудотворцу, предивному иерею Божию, праведному Иоанну, скорому помощнику страждущим и болящим, похвалу ныне принесем. Ты же, яко имевый велие дерзновение ко Господу еще на земли, ныне на небеси умоли Его благость о нас, во юдоли земной бедствующих, да благодарне тебе воззовем: Радуйся, отче наш Иоанне, земли Российския молитвенниче и чудотворче предивный.

ИКОС 1

Ангелом хранителем от детства водимый и от него молитвы непрестанныя творити наученный, ты молитвенник дерзновенный явился еси о людех Божиих, помощи у тебя просящих; темже, ведуще тя молитвенника крепка, вопием ти:

Радуйся, от юности молитве навыкнувый,

Радуйся, в пламенней молитве разумети учение дар получивый;

Радуйся, покаянием непрестанным сердце свое очищавый;

Радуйся, сего ради велие дерзновение в прошениях твоих ко Господу стяжавый;

Радуйся, в простоте сердца всякое прошение о людех Господу приносивый;

Радуйся, за простоту веры и смирение просимое всегда от Господа получавый;

Радуйся, отче наш Иоанне, земли Российския молитвенниче и чудотворче предивный.

КОНДАК 2

Видя, яко Бог скоро послушает молящихся Ему с верою, ты прилежал еси деланию сему, в немже восходящу ти от силы в силу, яви тя Господь дерзновенна молитвенника о всех людех. Ты же, имея в сердце устроение сие, воспевал еси Богу: Аллилуия.

ИКОС 2

Разум знанием Божественнаго писания просвещен имея и уставы церковныя от родительницы хранити наученный, ты всем верным был образом послушания святей Церкви, темже и мы, тебе в сем послушании последовати желающее, поем ти:

Радуйся, уставов церковных непреклонный хранителю;

Радуйся, заповедей евангельских пламенный ренителю;

Радуйся, образ кротости и смирения всем являй;

Радуйся, подвигу сострадания и милосердия твоего всех последовати призываяй;

Радуйся, многия нищия обогативый;

Радуйся, скорбящия и страждущия утешивый;

Радуйся, отче наш Иоанне, земли Российския молитвенниче и чудотворче предивный.

КОНДАК 3

Силою благодати облеченный, пастырем добрым града Кронштадта поставлен был еси, отче, идеже ты сораспялся еси Христу за люди, вверенныя тебе; болезнуя о падениях их и предстательствуя о них в Божественной евхаристии, ты вопиял еси выну Богу: Аллилуиа.

ИКОС 3

Имея богатство благодати, чудеснее получаемое в причащении святых Таин, ты к сему непрестанно призывал еси люди вся; и ныне, сердцами, оживотренными сими тайнами, поют они тебе таковая:

Радуйся, черпати богатство неизреченное в причащении святых Таин Христовых вся приглашаяй;

Радуйся, всегда благодарение приносити о сих тайнах напоминаяй;

Радуйся, к тем приступати с покаянием, верою и любовию призываяй;

Радуйся, яко в тех находити источник животворящий указуяй;

Радуйся, хладности избавляти научаяй;

Радуйся, неверия при сем избегати предостерегаяй;

Радуйся, отче наш Иоанне, земли Российския молитвенниче и чудотворче предивный.

Кондак 4

Бурю злых напастей претерпел еси, отче наш Иоанне, егда супружница твоя и архиерей лету тому не имели веры в подвиг твой. Ты же благодушно о Господе вся сия терпел еси, не преставая шествовати стезею заповедей Господних и поя Ему велегласно: Аллилуия.

ИКОС 4

Слышаше нецые о подвизех твоих и молитвах, недоумеваху, какова кончина будет твоя. Ты же, неизменно в творении заповедей пребывая, смиренно отвещал еси, да кончины пождут твоея. Мы же, дивящеся смирению твоему, вопием:

Радуйся, непреклонне на камени заповедей Христовых стоявый;

Радуйся, высокия чином удовлити человекоугодием не пожелавый;

Радуйся, на суд архиерейский по навету призванный;

Радуйся, яко клеветническая писания, тебе на суд вшедшу, листом белым обретошася;

Радуйся, яко молитвою твоею писания на нем возобновишася;

Радуйся, яко того ради познана бысть праведность жития твоего о Господе;

Радуйся, отче наш Иоанне, земли Российския молитвенниче и чудотворче предивный.

КОНДАК 5

Божественный свет озаряще душу, егда приобщашеся святых Таин Христовых, и той свет осияваше не токмо тебе самаго, но и всякую душу, из рук твоих причащенную. И тако облагодаствованная душа воспевала немолчно: Аллилуиа.

ИКОС 5

Видя враг человеческаго рода ревность твою ко служению Божественныя литургии, смущающее душу твою при совершении службы сия; но ты имея в душе образ покаяния и крепкое борение с помыслами, глубиною молитвенною побеждал тоя; сего ради и мы тебе зовем:

Радуйся, яко молитвенным борением с помыслами победу над врагом стяжал еси;

Радуйся, яко не токмо к сей борьбе, но и к покаянию глубочайшему всех призывал еси;

Радуйся, в писаниих твоих нам образ к борению оставивый;

Радуйся, радость в исполнении заповедей Божиих в них нам показавый;

Радуйся, теми поучаяй нас имети трезвение;

Радуйся, во всем показуяй о Господе разсуждение

Радуйся, отче наш Иоанне, земли Российския молитвенниче и чудотворче предивный.

КОНДАК 6

Проповедуя непрестанно слово Божие, отче Иоанне, ты всех людей земли русской призывал еси к покаянию, да исправят житие свое о Господе, да не постигнет их гнев Божий за беззакония; но тыя не внимаху тебе и не восхотеша пети Богу: Аллилуиа.

ИКОС 6

Возсиял еси яко пророк во отечестве своем, емуже не бе чести, понеже не внимаху людие тебе; сего ради постиже лютое испытание землю русскую, о нейже ты зело болезновал еси. Мы же, зрящее пророчества твоя сбывшаяся, глаголем ти таковая:

Радуйся, наделенный Господом даром прозрения;

Радуйся, всех умоляй: берегитесь соблазнов, да избегнем лютаго искушения;

Радуйся, беды грядущия на землю русскую предзревый;

Радуйся, твердо всегда стояти в вере православной всем велевый;

Радуйся, православныя веры поборниче крепкий;

Радуйся, ересей и лжеучений обличителю твердый;

Радуйся, отче наш Иоанне, земли Российския молитвенниче и чудотворче предивный.

КОНДАК 7

Хотя душу свою спасти и ближних ко спасению направити, прежде молитвою, трезвением и борением за чистоту сердца подвизался еси, нам же образ богомыслия твоего в писаниих оставил еси, да научении тобою, шествующе по стезям твоим, поем Богу: Аллилуиа.

ИКОС 7

Нова видя тя чудотворца, яко молитвою твоею больные исцелеваху, бесные свобождахуся, вси людие немощные и обременные к тебе притекаху, да молитву о них сотвориши, и по сей ослабу и исцеление обретшее, вопияху благодарне тебе:

Радуйся, молитвенниче теплый и милосердый;

Радуйся, чудотворче предивный;

Радуйся, заступниче странных и убогих;

Радуйся, залог здравия тела и души в таинстве причащения ведати научаяй;

Радуйся, сего ради к покаянию всех призываяй;

Радуйся, исправлением жизни благодарении Господу приносити повелеваяй;

Радуйся, отче наш Иоанне, земли Российския молитвенниче и чудотворче предивный.

КОНДАК 8

Странно и непостижне услышал еси пресладкий глас Владычицы Пречистыя, рекшия: «Вы – милейшая чада Отца Небеснаго». Сего ради исполнился еси весь трепета сладастнаго и возопил еси Богу: Аллилуиа.

ИКОС 8

Все желание твое бысть во еже бытии единем с Господем, да будет делом слово пророческое: прилепляйся Господеви един дух с Господем есть. И бысть слово сие делом в тебе; сего ради вопием:

Радуйся, непрестанно стремивыйся с Господем пребывати;

Радуйся, сего ради сердце свое не престававый очищати;

Радуйся, Божественную литургию во всяк день совершавый;

Радуйся, в причащении святых Таин силу духовную обретавый;

Радуйся, еюже всех обогативый;

Радуйся, силою тою чудеса творивый;

Радуйся, отче наш Иоанне, земли Российския молитвенниче и чудотворче предивный.

КОНДАК 9

Все слышавшие о тебе удивляхуся, яко не токмо приведенным больным исцеления подавал еси, но и далече сущим, о нихже писаху тебе, и тайно призываху тя, и тыя благодати сия не лишении быша. Сего ради вси исцелении, зрящее силу Божию, чрез тебя подаваемую, пояху Богу:Аллилуиа.

ИКОС 9

Витии суемудреннии дерзаху хулити силу Божию, в тебе действующую, и искушаху тя; вразумлении же наказанием Божиим, принося покаяние, вопияху:

Радуйся, яко истинно силою Божиею чудеса содеваеши;

Радуйся, яко теми чудесы всех к покаянию обращаеши;

Радуйся, яко тобою наказуемии, раскаявшиеся, твоею же молитвою исцелении, на путь истинный оттоле направляхуся;

Радуйся, яко призыванные тобою к покаянию не токмо телом, но и душею исцелеваху;

Радуйся, непрестанным попечением о бедных заповедь милосердия исполнивый;

Радуйся, всем житием твоим заповедь о любви к ближнему показавый;

Радуйся, отче наш Иоанне, земли Российския молитвенниче и чудотворче предивный.

КОНДАК 10

Спасительный путь избравый от юности твоея и даже до конца не ослабивый стремления твоего и шествия по узкому пути, в последния же дни к сему и мученический венец тебе приложися, но ты вся сия претерпевал еси, яко от Божия десницы, поя Ему : Аллилуия.

ИКОС 10

Стена и оплот многим был еси во дни жития твоего, егда неимущим помогал еси, бедствующих утешал еси, больных исцелял еси, падших возставлял еси, храмы воздвигал еси, обители устроял еси. Сего ради весь сонм обогащенных тобою вопиет тебе:

Радуйся, вдов и сирот питателя;

Радуйся, за падших предстателя;

Радуйся, болящих душею и телом целителю;

Радуйся, обителей невест Христовых строителю;

Радуйся, неусыпный о них попечителю;

Радуйся, всем вся бывый, да всяко неких ко Христу приведешь;

Радуйся, отче наш Иоанне, земли Российския молитвенниче и чудотворче предивный.

КОНДАК 11

Пение непрестанное и благодарственное присносим мы о тебе святей Троице, за еже даровала нам таковаго милостиваго предстателя и поем Ей: Аллилуия.

ИКОС 11

Светильниче пресветлый, украшением Церкви Русской Православной явился еси ты, святый праведный отче наш Иоанне; ты и по смерти твоей источаеши всем с верою приходящим ко гробнице твоей исцеления, дареуши утешение и различныя просимыя нужды удовляеши. Сего ради вопием ти:

Радуйся, яко во многия темныя лета не преста ходатайство твое о граде и людех твоих;

Радуйся, яко солнце возсиявый ныне на небе церковнем;

Радуйся, яко паки, якоже и древле, людие Божии обретают у раки твоея утешение;

Радуйся, яко тамо у всех исторгаеши о грехах сокрушение;

Радуйся, яко паки в детище твоем, святой обители Иоанновой, безкровная жертва приносится;

Радуйся, яко тамо тебе фимиам и молитвы возносятся;

Радуйся, яко паки в той многия невесты Христовы обретают спасение;

Радуйся, яко об обители той ты являеши непрестанное попечение;

Радуйся, отче наш Иоанне, земли Российския молитвенниче и чудотворче предивный.

КОНДАК 12

Благодати тезоимените, испроси нам сию от Господа, да очщеннии покаянием и таинством причащения, чистым сердцем восхвалим подвиги твоя и тя прославившему Богу воспоим: Аллилуиа

ИКОС 12

Поющее твое прославление, вемы, яко и поныне имеем тя многомощна молитвенника и печальника о земле Русской, о нашем же спасении ходатая непреложна; и благодаряще о сем Господа, тебе благодарне воспеваем:

Радуйся, к любви Господней всех нас призываяй;

Радуйся, за ближняго с любовию душу свою полагавый;

Радуйся, любовию озаренный, Господа в житии своем словом и делом прославлявый;

Радуйся, «имя Тебе Любовь» непрестанно ко Господу взывавый;

Радуйся, «чрез ту любовь не отвергни мене заблуждающегося» – вопиял еси Ему;

Радуйся и нас, заблуждающихся, тою любовию озарив, стаду сопричти своему;

Радуйся, отче наш Иоанне, земли Российския молитвенниче и чудотворче предивный.

КОНДАК 13

О, святый праведный отче наш Иоанне! Любовию твоею озари нас, грешных и немощных, поющих тебе сие малое пение и помози нам принести достойные плоды покаяния; перед кончиною же сподоби нас бытии причастниками святых Христовых Таин, да непрестанно поем с тобою на небесех хвалебную песнь Богу: Аллилуиа!

Молитва

О Великий угодниче Христов, Святый праведный отче Иоанне Кронштадтский, пастырю дивный, скорый помощниче и милостивый предстателю! Вознося славословие Триединому Богу, ты молитвенно взывал: «Имя Тебе – Любовь: не отвергни меня, заблуждающагося. Имя Тебе – Сила: укрепи меня, изнемогающаго и падающаго. Имя Тебе – Свет: просвети душу мою, омраченную житейскими страстями. Имя Тебе – Мир: умири мятущуюся душу мою. Имя Тебе – Милость: не переставай миловать меня». Ныне благодарная твоему предстательству всероссийская паства молится тебе: Христоименитый и праведный угодниче Божий! Любовию твоею озари нас грешных и немощных, сподоби нас принести достойные плоды покаяния и неосужденно причащатися Святых Христовых Таин. Силою твоею веру в нас укрепи, в молитве поддержи, недуги и болезни исцели, от напастей, врагов видимых и невидимых избави. Светом лика твоего служителей и предстоятелей олтаря Христова на святыя подвиги пастырского делания подвигни, младенцем воспитание даруй, юность настави, старость поддержи, святыни храмов и святыя обители озари! Умири, чудотворче и провидче преизряднейший, народы страны нашея; благодатию и даром Святаго Духа избави от междоусобныя брани, расточенныя собери, прельщенныя обрати и совокупи Святей Соборней и Апостольстей Церкви. Милостию твоею супружества в мире и единомыслии соблюди, монашествующим в делах благих преуспеяние и благословение даруй, малодушныя утеши, страждуших от духов нечистых свободи, в нуждах и обстояниих сущих помилуй и всех на пусть спасения настави. Во Христе живый, отче наш Иоанне, приведи нас к Невечернему Свету жизни вечныя, да сподобимся с тобою вечнаго блаженства, хваляще и превозносяще Бога во веки веков. АМИНЬ.

 

Тропарь, глас 1-й:

Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Тайн благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкве нашея украшение, моли Всеблагаго Бога умирити мир и спасти души наша.

Кондак, глас 3-й:

Днесь пастырь Кронштадтский предстоит Престолу Божию и усердно молит о верных Христа Пастыреначальника, обетование давшаго: «Созижду Церковь Мою и врата адова не одолеют ей».

Величание:

Величаем тя, святый праведный отче Иоанне, и чтим святую память твою: ты бо молиши за нас Христа, Бога нашего.

Назад к списку